Um félagið

Frú Laufey félag um skaðaminnkun var formlega stofnað þann 22.maí 2015 og var stofnfundur haldin í sal sem Landspítali bauð uppá í tilefni stofnfundar. Á stofnfundinum mætti meðal annarra hin merka kona Ruth Dreifuss fyrrverandi innanríkisráðherra og forseti Sviss og sendiboði Alþjóðanefndar um stefnuna í fíkniefnamálum. Ásamt henni mættu aðilar allstaðar að í samfélaginu sem hafa vilja til að standa við frekari þróun skaðaminnkunar hér á landi.

Aðilar sem stóðu að stofnun félagsins voru fagaðilar sem áður höfðu starfað saman í Frú Ragnheiði - nálaskiptaþjónustu Rauða Krossins. Þessir aðilar áttu það sameiginlegt að hafa áhuga á að láta ennfrekar til sín taka og huga að því að efla skaðaminnkandi þjónustu og þekkingu á Íslandi. Með það í huga að samþætta heilbrigðis- og velferðarkerfið og gera það að verkum að hægt sé að veita heilstæða þjónustu fyrir þá sem verða fyrir skaða vegna vímuefnanotkunar og þurfa á henni að halda. Því var ákveðið að stofna samtök sem sérhæfa sig í málefnum skaðaminnkunar.